Romeinse legionairs in Mofert

Zónjig 13 juni zal `t Brook ein publieksevenement plaatsvinje ter gelaegenheid vanne oplevering van `t heringerichte Vlaot en de Helderbaek. Vanaaf 13.00 oere begintj `t publieksprogram mit ein wanjelroute langs de heringrichte baek en ''echte'' Romeinse legionairs.

De Romeinse muntjsjat is 13 juni te bewónjeren op `t Kestieël (Foto: Watersjap Roer en Overmaas)

Bie de herinrichting van `t Vlaot, zeen in `t Brook 71 Romeinse muntje gevónje. Vermoed wuuertj det dees örges inne ieëste ieëw zeen verstop door `ne Romeinse legionair. Langs `t Vlaot zeen 5 replica's van 45 centimaeter groeat geplaats, die ouch dae zónjig officieel onthuld waere. `t Watersjap, de gemèndje, RAAP Archeologische Adviesbureau, `t Limburgs Landschap en de heemkundevereiniging höbbe hiemit de archeologische vóns belaefbaar gemaak. Op 13 juni is de Romeinse muntjsjat einmaolig te bekieken op `t Kestieël.

Van 13.00 toet 17.00 oeren is van alles te belaeve. Doe kóns `n wanjeling make tössen `t Sweeltje en `t Kestieël. Zoeawie gezag is op `t Kestieël de muntjsjat te bewónjere. Ouch kóns se dao informatie kriege euver de Romeinse vóns. Speciaal veur deze gelaegenheid bivakkeerd d'r `ne groep Romeinse legionairs bie `t Kestieël. Wie edere zónjig in `t zomersezoen kóns se-n ouch `t Kestieël bezichtige, mit of zónger gids. Stichting IKL (Instandhouding Kleine Landschapselementen in Limburg) haet bie `t Kestieël `ne veldjpós ingerich. Langs `t Vlaot in `t Brook zeen veldjpóste euver `t Watersjapswèrk en euver natuur en (cultuur)historie.

Mits neet anges vermeldj, valle alle tekste op dees pagina ónger `n Creative Commons Licentie.