Stroumstuuering tröf ouch Mofert

Dinsdigmiddig 19 mei haet `n groeat deil van Midde-Limburg zónger stroum gezaete, wo-ónger ouch Mofert. De stuuering waerdje veroearzaak door `n bedriefsóngelök bie `n verdeilstation van Enexis inne Baek. Door de stroumstruuering haw Mofert dae middig ouch gein struimendj water en hawwe sommige mobiele netwèrke slech bereik. Neet allein pertekelere hawwen euverlas. Ouch de Moferse bedrieve móste zich behelpe. Mer, de Moferter middestenjers zeen neet veur ein gaat te vange. Veer ginge kieke bie Riech inne winkel, wie zie ómginge mit dit óngemaak.

Drökdje bie Riech ane kassa; alles mos ajerwits mitten handj.

De lektriese sjuufdeure dejen `t neet, dus die stóngen aop. Gelökkig waas `t good waer. Door `n duuster gankpaad lepe veer nao achter inne richting vanne bekkerie. ''Höbtj geer nanne vólkaore wèk?''. ''Jao, mer neet gesneje'' waas `t antjwaord. Alleh, dan heim mer zelf snieje. Veer krege nag `t advies ''Kiek oet mitte vingers!'' mit.

Inne rie bie kassa stóng `n vrouw Spa Blaw te zeuke inne rèk, veur te kaoke. In `t duuster is det ouch lestig zeuke. Mer, `t waas vergaefs: Spa Blaw waas oetverkoch.

Ane kassa waerdje ijverig getèldj mit `n tèlmesjien. Klantje loupe truuk de winkel in óm te kieke waat de waar kósdje. Pinne waas netuurlik onneet meugelik, dus `t debiteurebeukske waerdje flink volgesjreve. Gelökkig weite die winkelmaedjes de pries van dae wèk oete kop.

Zoea zuus se mer wie aafhankelik veer allewiel zeen van dae stroum. `t Laeven in Mofert stóng neet stil; det zeker neet. Meh, doe mèrks waal `ns wie lestig `t is zónger stroum.

Óm `n oer of 8 haw Mofert weer spanning op `t net staon. `ne Babyboom euver 9 maondj zal dus waal oetblieve.

Mits neet anges vermeldj, valle alle tekste op dees pagina ónger `n Creative Commons Licentie.