Pestoear Pisters: 50 jaor priester

Aafgeloupe 2 april waas `t persies 50 jaor geleje, det oze zeergewaardeerde pestoear Pisters priester gewiejd waerdje. Dit jubileum wuuertj zónjig 18 april gevierd mit ein mès en `n receptie.

Pestoear Paul Pisters (Foto: Parochie Cluster Roerstreek)

Paul Pisters waerjde op 24 oktoeaber 1933 in Kunder gebaore. In 1946 stóng al min of mieë vas det Pisters `ne geiselik zou waere. In det jaor ging hae nao `t Klein Seminarie op Rolduc. Tieën jaor later ging hae nao `t Groeat Seminarie in Remunj. Dao zoot d't toet 1960. Op 2 april van det jaor waerdje hae door buusjop Moors van Remunj toet priester gewiejd. `tzelfdje Jaor nag waerdje d'r beneumptj toer keplaon vanne parochie O.L.V. Ónbevlek Óntvange op Keuningsbós. Persies tieën jaor later waerjde d'r keplaon vanne daekenale parochie H. Gregorius de Groeate in Brunsem. Op 1 november 1977 waerdje Paul Pisters beneumptj toet pestoear en waal van oze eige parochie H. Catharina. `n Paar waeke later waerjde d'r geïnstalleerd. En noe, diek 32 jaor later is hae nag altied pestoear van oos parochie.

Zónjig 18 april wuuertj pestoear óm 10.00 oere oppe pasterie opgehaoldj en nao de kirk gebrach. Óm 10.30 oere begintj de Hoeames. Nao de mis wuuertj pestoear in fieëstelike stoet nao D'n Hoes gelèdj, wo de receptie zal zeen. De receptie zal doere toet 15.00 oere.

Mits neet anges vermeldj, valle alle tekste op dees pagina ónger `n Creative Commons Licentie.