Opkóms Mofert hoger es Roerdale; Lies Nisse ''wint'' in Mofert

Oet de siefers per stömbureau kónne veer opmake det de opkóms in Mofert hoger is es `t gemiddeldje inne gemèndje Roerdale. De totale opkóms inne gemèndje waas 61%, terwiel de opkóms in Mofert 70% waas. Dees siefers kónne aafwieke vanne wèrkelikheid, ómdet me-n in eder stömbureau inne gemèndje kós stömme. `t Is aevel ónwaarsjienlik det d'r in Mofert mieë boetedörpse höbbe gestömp es det d'r Moferter boete Mofert höbbe gestömp.

Es me kiek nao de stömme waat inne twieë stömbureau's in Mofert oetgebrach zeen, kóns se zeen det de Moferse Lies Nisse dudelik väöl steun haet gekregen oet Mofert. In Mofert stömdje maar leefs 813 luuj op Lies Nisse. Mit 1749 oetgebrachdje stömme in Mofert is det `n percentage van 46%. Ouch hie kan waal `t beeldj e bietje verteikendj zeen ómdet me-n euveral kós stömme.

Es Mofert es gemèndje zelfstenjig zów zeen en dezelfdje Moferter luuj kandidaat wore, dan zów Lies Nisse zelfs `ne absolute meerderheid inne raod höbbe van 6 zetels (oetgaondje van `ne raod van 11 zetels). `t CDA zów 3 zetels haolen en Same Verder (Roerstreek Lokaal) 2. Veur Lies Nisse zówwe inne raod kómme: Baer vanne Zuul, Wimke van Nes, Frans Pieëters, Leo Corsjes, Ivonne Ramaekers en Helga Roeme. Veur `t CDA zów John vanne Vogel same mit Jeroen Crieëmers en Angela Cupers inne raod zitte. Same Verder zów dan in eder geval de ''liestrèkker'' Willem van Pol drin höbbe zitte. Marlies Jacobs zów dan es twieëdje van dees lies inne raod zitte. Wim Hawinkels haw dan waal aeveväöl stömme es Marlies, mer hae waas zoeagezag de liesdujer van Mofert en is bewös oete raod gegaon inne aafgeloupe periode.

Dit is natuurlik allemaol mer virtueel en `t beeldj is verteikendj. Want wie kump det, det Lies Nisse in Mofert zoeaväöl stömme haet gehaoldj? Det kan twieë dinger beteikene. Ten ieëste kan `t zoea zeen det de Moferter gaer op `n Moferse lies stömp. Anen angere kantj kan `t ouch zoea zeen de Moferter `t leefs op `ne Moferter stömme. Det lèste kiek `t geval te zeen.

`t Stömgedraag is dudelik oppe persoean gerich en neet oppe pertie. Kandidate haolen in eige dörp de meiste stömme. Det zeen veer trouwens inne ganse gemèndje veurkómme. Aangezeen Lies Nisse 20 kandidaten oet Mofert haet krieg dees lies es gevolg daovan väöl stömmen in Mofert. Want es se-n `t aantal stömmen in Mofert oetzèts taengen `t aantal Moferse kandidate, dan kump d'r `n gans anger beeldj nao baove. De Moferse CDA'ers höbbe dan `t meiste aantal stömme in Mofert gekrege per Moferse kandidaat. Op nómmer twieë kump dan Roerstreek Lokaal en pas op nómmer 3 Lies Nisse.

Waal mot gezag waere det de ieëste drie kandidate op Lies Nisse róndj de 200 stömme höbbe gekregen in Mofert. Get waat veur de res alein Willem van Pol haet vaerdig gekrege. Willem haet mit 236 dan ouch `t meiste aantal stömme gekrege in de Moferter stömbureaus. Euver gans Roerdale bekeken haet Baer vanne Zuul de meiste stömme gekrege van alle Moferter kandidate.

De populariteit van de ''dörpse'' pertieje liek te zeen aafgenómme. Zoeawaal Lies Nissen es de Jóngerelies verluus zetels. Mesjiens kump `t ómdet d'r nag mer twieë van die pertieje mitdoon. Waal mot gezag waere, det 2 zetels veur `n ''dörpse'' pertie nag altied gein slech resultaat is. Of dezen trend zich doorzèt zeen veer euver 4 jaor.

Mits neet anges vermeldj, valle alle tekste op dees pagina ónger `n Creative Commons Licentie.