Roerstreek Lokaal winnieër gemèndjeraodsverkezinge

De pertie Roerstreek Lokaal haet mitte gemèndjeraodsverkezinge van 2010 `t meiste aantal stömme gehaoldj. De fusiepertie - ónger angere óntstange oet de Moferse lies Samen Verder - haoldje 2732 van de stömme. Daonao volg `t CDA mit 2443 stömme. De Moferse Lies Nisse haoldje `t teleurstèllendje aantal van 1264 stömme. In totaal zeen d'rs 9975 geljige stömme oetgebrach.

Toet op dit moment waas Roerstreek Lokaal ouch al de grotste fractie, gevolg door `t CDA. Det liek noe weer `t geval te zeen. Roerstreek Lokaal verlaor aevel waal eine zetel en kump noe op 6 zetels oet. `t CDA wintj eine zetel en zal mit 5 man inne raod zitte. Lies Nisse krieg geine reszetel en kump daomit op 2 zetels oet, `n verlees van 2 zetels ten opzichte van de veurige verkezinge. De VVD wint 2 zetels en steit noe op 3. De Posterse Jóngerelies haoldje persies aeveväöl stömme es Lies Nisse en kump dus ouch oet op 2 zetels, `n verlees van eine zetel. Nuujkómmer Democrate Roerdale haoldje mit 780 stömme eine zetel.

Waat det beteikendj veur de Moferse kandidate kan nanneet mit zekerheid gezagwaeren, ómdet `t aantal stömme per kandidaat nanneet bekindj zeen. `t CDA wiltj mit häör keessysteem oet eder kern `n raodslid drin höbbe. Doordet zie mer 5 zetels höbbe behaoldj zal zeker ein kern geine CDA-volksvertaengewäördiger inne raod kriege. Zoeawiezoea motte de Moferse CDA'ers minimaal 80% vanne keesdeiler gehaold höbbe. Door `t hoeage aantal stömme veur `t CDA in `t stömbureau inne Vaart is bekans zeker det dit gehaoldj is. Es Mofert `ne CDA'er moog levere inne raod lègk `t veure handj det dit de nómmer 2 John vanne Vogel zal zeen.

Op basis van nómmer zal van Lies Nisse Baer vanne Zuul en Wimke van Nes inne raod kómme. Kiekendj nao `t stömgedraag van de kezers per stömbureau is bekans waal zeker det alle twieë de Lies Nisse-zetels door Moferter ingevöldj waere.

Kiekendj nao `t stömgedraag van de Moferter liek `t ónwaarsjienlik det de VVD `ne Moferter inne raod krieg.

Bie Democrate Roerdale zal waarsjienlik de liestrèkker inne raod gaon zitte, dus ouch geine Moferter. De Jóngerelies haet zoeawiezoea geine Moferter drop staon.

Roerstreek Lokaal zal - es me-n oet geit van de liesvolgorde - zal Willem van Lambaer oete Baenj waal inne raod blieve zitte. Volges ós is `t zeer waarsjienlik det dit ouch gebeurd.

Zoeawie `t d'r noe haer oetzuutj zólle d'r inne nuje raod 4 zetels door Moferter ingevöldj waere. Ein good resultaat es me bekiek det eder kern gemiddeld 3 zetels en e bietje te verdeilen haet. Baovegemiddeldj dus.

Mits neet anges vermeldj, valle alle tekste op dees pagina ónger `n Creative Commons Licentie.