Gemèndjeraodsverkezinge: Waat wille de kandidate mit Mofert

Euver `t algemein wuuertj d'r bie de gemènjderaodsverkezinge gekaldj euver algemeine zake, visies en speerpuntje. Toch vinje veer hie en dao contrete veurbeeldje euver waat me-n in Mofert van plan is. Hie-ónger vinjs se de concrete planne veur Mofert en de Moferter kandidate per lies op volgorde van liesnómmering.

`t CDA maak flink propaganda mit `t lokale. Zie höbbe volges eige zègke `n uniek keessysteem. Volges häör geit `n stöm op `n bepaolde kern neet verlaoren aan `n anger kern. In werkelikheid zitj `t nag get ingewikkeldjer inein. In ieëste instantie wille zie `n zoea good meugelike verdeiling van zetels euver de kerne. Zoealang es `n bepaoldje kern 80% vanne keesdeiler haoltj, haet de kandidaat per kern mitte meiste stömme es ieëste rech op `ne zetel. Daomit kónne dus de ieëste zès meugelike zetels ingedeildj waere, d'r zeen ja zès kerne. Es d'r mieë es zès zetels te verdeile zeen, dan kump `t kernesysteem pas ech in wèrking. De kern waat procentueel de meiste CDA-stömme haet gekrege krieg ouch de meiste zetels vanne CDA-fractie. CDA Roerdale vónj dit systeem `t meis ieërlik, volges liestrèkker Chrit Wolfhage. In `t promotiemateriaal van `t CDA staon ouch concrete planne waat betrèkking höbben op Mofert: Betaalbare starters- en ajereweunine, oplossing veur voetbalterrein ''De Wiejerd'', realisatie of behaad van `n evenementeterrein, minimaal handhave van bestaondj middestandjniveau en bestreide van verkeersonveiligheid veur fietsters. De Moferse kandidate veur `t CDA zeen John vanne Vogel, Jeroen Crieëmers, Angela Cupers, Peter Verheije (Keeks), Constant van Genouwe en Cees Verkamme.

Lies Nissen is `n echte Moferse lies, mit 20 vanne 24 Moferter oppe lies. Bie `t ''netwerke'' profileert dees lies zich ouch dudelik es `n lies veur Mofert, al is det neet zwart op wit (of greun) truuk te vinje. Frans Pieëters maak reklaam mit zien verdeenste veur Mofert euver de aafgeloupe periode, zoeawie `t behaad vanne kirmes, mer kump in ziene flyer neet mit concrete planne veur Mofert. Veur de volledigheid numme veer ouch de Moferse kandidate veur dees lies. Dao kómme ze: Baer vanne Zuul, Wimke van Nes, Frans Pieëters, Leo Corsjes, Roger Jansse, Ivonne Ramaekers, Jan Geraedts, Cindy van Pol, Cor Pieëters, Toon vanne Roeper, Helga Roeme, Mark Mieëwese, Jeroen Tiese, Harrold Knoeabe, Huub vanne Sliep, Har Geele, Jean-Pierre Bonnee, Rob Huits, Ralf Timmermans en Martien Coene.

De VVD haet 3 Moferter oppe lies staon, namelik Marjan van Bielmaekers, José Vergoease en Sjra Pöts. De VVD maak gein reklaam mit concrete planne in Mofert.

Democraten Roerdalen haet eine Moferter drop staon, namelik William van Brentjes. Gein zake euver Mofert waere vermeldj.

De Jóngerelies haet geine Moferter drop staon. Dit is dan ouch `n echte Posterse lies. De plaatsnaam Mofert kump dan ouch neet veur in häör program. Waal wille zie in blieve zètten op behaad van natuur in ónger angere `t Roeazendaal.

Fusiepertie Roerstreek Lokaal, waat ónger angere gevormdj is ouch de Moferse lies Samen Verder haet 7 Moferter drop staon: Willem van Lambaer oete Baenj, Ben Beckers, Roger Ticheler, Johan van Lambaer oete Baenj, Marlies Jacobs-van Ophaove, Corneille Kempkes en veurmalig Same verder-liestrèkker Wim Hawinkels. Willem adverteerd in ziene flyer mit de volgende puntje veur Mofert: Behaad van eigenheid van Mofert en noodzakelike veurzieninge veur Mofert laevesloupbestendig te make.

Mits neet anges vermeldj, valle alle tekste op dees pagina ónger `n Creative Commons Licentie.