Gemèndjeraodsverkezinge: Is d'r get te keze?

De gemèndjeraodsverkezinge staon weer veur de deur. De aafgeloupe waeke zeen de burgers weer euverstruimp mit promotiemateriaal van de deilnaemende pertieje. Van hobbymetskes toet sjroeapwaofels en `ne gansen houp pepierwèrk. Ouch de lokale ómroop OR6 bestaejd aandach ane verkezinge mit ónger angere `t liestrèkkersdebat waat zónjig haet plaatsgevónje. Euver `t algemein is d'r mer min verdeildheid euver waat de pertieje wille bereike. `t Versjil zitj `m veural in wie det zie `t wille bereike. Is d'r get te keze?

D'r wuuertj good geloesterd nao de burgers, zoea zègke de pertieje. `t CDA haet zelfs `n enquête gehaje. Roerstreek Lokaal zaetj `n enquête neet nuuedig te höbbe; dudelik `n toespeling inne richting van `t CDA. Zie meine de signale oete samelaeving op te pakke same mit de oetkómste van de burgerpeiling. Frans Pieëters van Lies Nissen zaetj ouch det d'r nao de kezers loesterdj. De nuujkómmer Democraten Roerdelen zaetj ouch det häör kandidate loestere nao de luuj. Angere pertieje gaeve det neet zoea dudelik aan in häör program, mer höbbe waal speerpuntje waat zich neet väöl versjille van de angere. Vèltj d'r dan nag waal get te keze? De meininge tösse de pertieje loupe waal nagal oeterein euver wie det dit alles bereik mot waere, neet zoeazeer waat d'r bereik mot waere.

Mit namen `t financieel beleid versjiltj nagal. `t CDA mèntj mit de connecties op hoger niveau allerlei pötjes aan te kónne baoren óm de begruueting róndj te kriege. Volges liestrèkker Chris Wolfhagen kónne veer waat det betröf `n veurbeeldj naemen aan Remunj. Dae zeen volges Wolfhage de laste leger en toch kómme ze róndj dankzij subsidies van hoger euverhede. Lies Nissen stuurt aan op gein lasteverhuueging. Wie de begruueting dan rónj mot kómme bliek neet gans oet `t program. Bezuniginge en efficiëntie lieke veure handj te lègke. De VVD zètj in op gein lasteverzwaoring, wodoor ouch bezuniginge ónvermijdelik lieke, zoea bleek oet `t liestrèkkerdebat. Democraten Roerdalen vindj es ènsigste det `t ónrealistisch is óm te belaove det de laste neet ómhoeag gaon, zoea bleek oet `t liestrèkkersdebat. Gein belofte dus, wal wuuertj d'r waal gestreef nao geliekblievendje laste. Efficiëntie is bie häör ouch `n puntj oet de categorie financië. De Jóngerelies wiltj det kanse gepak waere bie Europese geldjpötjes. Ouch zie zètten in op gein belanstingverhuueging, mer sloete det in `t program neet oet. Roerstreek Lokaal wiltj de begruueting sloetendj kriege door `n efficiëntere ambtelike organisatie. Doe zuus: de kandidate zeen nag sterk verdeild euver de vraog wie de begruueting sloetendj gekrege mot waere.

Mits neet anges vermeldj, valle alle tekste op dees pagina ónger `n Creative Commons Licentie.