Äöpening Roerdriehookmuseum

Zónjig zal oppe Diekestraot de äöpening zeen van `t Roerdriehookmuseum. `t Museum besteit oet de privé collectie van Roy Pfennings. De Roerdriehook is volges Pfennings `t gebied tösse Roer en Maas ten noorde vanne lien Zittert-Geilenkirchen. Wie dae tiedens de bedreiding in 1945 nag in henj waas vanne Duitse bezètter. Mitte Britse operatie Blackcock mos dit gebied gezuverd waere van de Duitse vijand. Get waat väöl lestiger bleek te zeen es veurhaer gedach.

Ein deil oete collectie van `t museum mit in `t midde `n origineel tankuniform vanne 8e Amerikaanse tankdivisie oet daen tied. (Foto: Roger Dircks)

Roy Pfennings waas es kindj al geïnteresseerd in dit saort dinger en dan veural de Twieëdje Werreldoorlog. Wie d'r `n aantal jaor geleje in Berg ging wone begós de interesse in de Roerdriehook. Doordet d'r erg weinig bekindj waas euver de 8e Amerikaanse tankdivisie, waat ouch deil haet genómme aan dees operatie, begós hae te spitte in `t verleje. Daodoor is zien specialisatie óntstange in dees Amerikaanse tankdivisie.

De geallieerde höbbe zich flink verkeken op `t verloup van operatie Blackcock. Ónger angere `t waer goojdje root in `t aete. `t Waas vors, snieë, duuej, weer vors; neet get waat se gaer wils bie zón militaire operatie. Ein anger knelpuntj waas Sint-Joeas. Det dörp bleek vol te zètte mit Pruse fallschirmjäger. Waarsjienlik is det ouch ein van de raejes det me Mofert zoea zwaor haet gebómbardeerd. Oeteindelik bleke de meiste Pruse in Mofert ane Berg te zètte in plaats van in `t Dörp. Ane Berg, wo noe de rotonde is höbbe de geallieerde flink väöl taengestandj gadj vanne Pruse. Wie Lin en Berg in geallieerde henj waas dach me det de Roerdriehook waal zoeawied bevreid waas. Ouch det bleek `n illusie te zeen. Bie Maerem ane Sodafebriek en in `t Linderveldj zeen nag flinke gevechte gewaes; get wo ouch neet väöl euver bekindj is.

`t Idee veur `n museum is eigelik óntstange doordet Pfennings döks op basissjoeale vertèldj euver d'n oorlog enne bevreiding. Door ederkieërs allerlei attribute mit te naeme leej de collectie. Ouch bös se dan beperk mit waat se-n allemaol mit kóns naeme. Mit zón museum kónne de kinjer zelf kómme kieke en kóns se-n alles laote zeen waat se oet höbs gestaldj. `t Museum geit neet alein mer euver de bevrijding van de Roerdriehook. De gansen oorlog kump aan bod; van de mobilisatie toet de bevrijding

Zónig wuuertj óm 15.00 oer de officiële äöpening gedaon in `t biezeen vanne börgemeister. D'n Diekestraot wuuert veur dees gegaegenheid vanaaf 12.00 oere aafgeslaote. Det mot ouch waal want de straot kump vol te staon mit riejend materieel van de geallieerde oet daen tied. Det materieel is van leje vanne vereiniging Santa Fe, wo Pfennings ouch lid van is. D'r kump zelfs `nen tank oppen Diekestraot te staon. Zeker de meujte waerd óm `ns te gaon kieke.

Mits neet anges vermeldj, valle alle tekste op dees pagina ónger `n Creative Commons Licentie.