"Jonge Klaore" wint Zate Hermeniekes Festival
Zaate Hermenie Jonge Klaore vanne Nuujstad haet `t Zate Hermeniekes Festival gewónne, waat aafgeloupe zónjig in Mofert gehajen is door de vastelaovesvereiniging in samewirking mit Joekskapel Eine Ôngerein. Wie aljaors wore weer de sjoeanste zate hermeniekes en joekskepelle oet Limburg nao Mofert getroch óm mit te doon aan dit festijn. `t Waas ouch weer `ne spannende stried. Oeteindelik bleek de Nuujstadse kepel de bèste te zeen mit ein paar punte veurspróng oppe nómmer twieë. Dae nómmer twieë waas geinen ónbekindje in Mofert; det waas de titelverdediger De Baerekepel oet Hael. Ouch de nómmer drie, Sociëteit Sus Crofa oet Ech, is al dökker op `t Moferse ZHF gewaes.
Naeve de drie bèste kepelle waas d'r ouch `nen aanmoedigingspries. Dae ging nao ein van de drie Moferse kepelle waat mitdeje, namelik Loester Neet. Mit get dèksele, iezere stekker en bie-eingeraapdje instrumente wiste zie in eder geval d'n aandach te trèkke van `t loesterpubliek. De pries veur de ludiekste muzikant ging nao de trómbónis van Sus Crofa (dae mit de gekluuerdje trómbón). Toet slot waerdje ónnag de pries oetgereik veur de bès versierde kefee. Dae ging dit jaor weer nao Kefee De Rotonde. `t Is al neet mieë bie te haje wie döks det dees kefee dae pries haet gewonne. D'r waas ouch weer hieël get tied en aandach bestaejd aan `t versiere van Kefee De Rotonde.
Mits neet anges vermeldj, valle alle tekste op dees pagina ónger `n Creative Commons Licentie.
|
|
