`n Reis doren tied mit Turn Back Time 3

Vriedig 18 en zaoterdig 19 december nump de fómfaar uch veure derde kieër mit op `n reis doren tied mit de derde editie van Turn Back Time. Tiedens dit uniek showkónzaer krieg geer `n reis doren tied mit väöl TV-herinneringe. In totaal mieë es 125 artieste en luuj achter de sjerme make dit showkónzaer waor.

Poster van Turn Back Time

Muzikale bedrages zeen d'r van popband Moereflaai, accordeonis Dwayne Verheijden, kinjerkoear ''De Moferter Zengerkes'' en nag mieë Moferter zangsoliste. De meziekshow wuuertj aangevuldj mit dans van dansgroep Mirage en geluid- en leechshow mit foto- en filmbeeldje van vreuger. Meh d'r waeren ouch live-beelje getoeandj van de artieste, verzorg door de lokale ómroop OR6. D'n aovendj wuuertj geprizzenteerdj door Karel van Mofert en Fred van Piet van Plien.

Ónger `t motto ''Heimweh-TV'' wuuertj geer mitgenómme doren tied ane handj van praakmakende TV momente oete gesjiedenis. Waat dachs se van de maord op John F. Kennedy, de ieëste maonjlanjing of de televisie-marathon ''Open het dorp'' mit Mies Bouwman. Väöl luuj kónne zich dees TV momente nag herinnere esof `t gister waas. Wits se nag? D'n tied des se meh twieë Hollenjers haws, `n paar Pruse en mit e bietje gelök onnag de Besj. Väöl te zeppe waas d'r neet. Det waas mer good ouch, want doe moos toch ederskieër opstaon óm `n anger kenaal op te zètte. Doe bleefs heim veur series wie Swiebertje, Dagboek van een Herdershond en Zeg `ns Aaa. Ouch gebeurtenisse oet `t get mieë recenter verleje passere de revue, zoeawie de doead van Prines Diana en d'n aanslaeg van 11 september.

Kaarte zeen noe te kriege bie Bekkerie Cox, Sjechter Smeets en bie de leje vanne fómfaar. Zitplaatse koste € 15,- en staonplaatse € 12,50. D'n aanvang is op allebei de aovendje 20.00 oere. Vanaaf 19.00 is de kassa aop, wo se onnag kaarte kóns kriege (mits `t neet is oetverkoch).

Mits neet anges vermeldj, valle alle tekste op dees pagina ónger `n Creative Commons Licentie.