Actiecomité Kermis: "Veer laoten `t d’r neet bie zitte"

Al inkel maonje is d'r in Mofert `n actiecomité bezig mit `n actie veur de basissjoeallieërlinge vrie te gaeve mit Moferter Kirmes. `n Handjteikeninge-actie haet inmiddels `n stok of 1600 handjteikeninge opgeleverd van miense waat `t mit `t comité èns zeen. Nao de handjteikeninge-actie haet `t comité door `t ganse dörp pamflette opgehange. `t Laeze van dees pamflette lieërt ós det de kwestie nagal hoeag zit. ''De school inclusief de MR doet wat ze willen'' steit d’r ónger angere op. Dit comité veult zich dudelik neet serieus genómme dore sjoeal.

`t Actiecomité haet volges eige zègke kóntak gadj mitte sjoeal, de gemèndje enne MR véúr `t begin vanne actie. Volges häör duit de sjoeal noe esof det neet `t geval is. Waordveurder Petra Verstegen in `n sjriftelikke verklaoring: ''Ook was er met ons afgesproken door een van de MR leden dat we een agendapunt kregen. Helaas wisten ze dat niet meer op de MR vergadering.'' Op `t pamflet wuuert MR-lid Sharon van der Horst mit naam geneump. `t Geneumdje MR-lid woor oppe bewuste vergadering van 6 juli neet aanwezig. Nao aafloup vanne vergadering vroge inkel ajers - waasjienik verbaas det `t neet oppen agenda stóng - aandach veur dit puntj. Directeur Paul Maassen haet vervolges dit item veur zie raekening genómme. Euverigens is in dezelfde vergadering beslaoten óm op 31 mei 2010 (kirmesmaondig) `nen teamdaag in te planne. De kinjer zeen dus volgend jaor zomerkirmes in eder geval verzekerd eine vriejen daag.

Paul Maassen, dae veur de sjoeal van Mofert `t vekantieruuester maak, reageert: ''Veer hajen ós aan de regels, waat ós vanoet `t ministerie opgelag waere en `t beleid van `t sjoealbestuur. Mit de resoere, waat dan nag euverblieve kènne veer neet garandere, det de kinjer nao kómmedj sjoealjaor vrie kriege mitte kirmes.'' Det haet veur e deil d'rmit te make, det de sjoeal nao 2010-2011 euver wiltj gaon nao `t zoeagenaamde Hoorns model. Det Hoorns model haet weer te make mit `n verangering inne wèt. Volges `t actiecomité zeen d'r waal degelik meugelikhede: ''Veer höbbe kóntak gadj mitte gemèndje en d’r zeen meugelikhede óm vrie daag te creëre mitte kirmes. De kinjer kriege dan neet mieë vrie, mer die daag motte van `n anger vekantie, beveurbeeldj de meivakantie aafgehaoldj waere.'' aldus Petra Verstegen.

Volges Maassen is d'r vanoet `t sjoealbestuur `n bepaoldj beleid. Dit bestuur - waat op dit moment in henj is vanne Stichting Swalm & Roer voor onderwijs en opvoeding - stèltj e vekantieruuester vas. De gemeinsjappelikke MR (GMR) haet adviesbevoegdheid bie de regeling van de vakantie. Deze GMR wuuert gekaoze door alle MR-leje, waat binne dees stichting actief zeen. Det wiltj neet per se zègke, det d'r emes vanoet de sjoeal van Mofert zitting haet in deze raod. Helaas höbbe veer MR-veurziter John van Fäös nanneet kónne bereike. Ouch `t College van Bestuur höbbe veer in verbandj mitte zomervekantie neet kónne spraeke. Nao de vekantie vraoge veer häör nag óm `n reactie.

`t Zuutj d'rhaer oet, det `t actiecomité noe mot aankloppe bie `t bestuur of bie de MR. In eder geval steit `t puntj oppen agenda vanne volgendje MR-vergadering, waat waarsjienlik in september gehaje wuuert. Dees waek kump `t comité ouch mit nuuj pamflette. Wuuert dus zeker vervolg.

Mits neet anges vermeldj, valle alle tekste op dees pagina ónger `n Creative Commons Licentie.