Veurbereidinge Middelieëws Mofert in volle gang

Kómmend weekend (18 en 19 juli 2009) zal op en róndj `t Kestieël veur de derde kieër `t evenement Middelieëws Mofert plaatsvinje. Zón groeat evenement verg netuurlik `ne gansen houp inspanninge en veurbereidinge vanne organisatie. De veurbereidinge op pepier zeen netuurlik al maonje bezig, mer noe begint me-n ouch al op `t terrein get te zeen.

Vriewilligers zeen op `t Middelieëws-Mofert-terrein bezig mitte veurbereidinge.

Wèrkluuj zeen hel bezig óm de zoeagenaamde Bókkeriejerskerker oppertied vaerdig te kriege. Deze kerker, waat inne witte tore gesitueerd is, wuuert toegangkelik gemaak veur `t publiek door middel van ónger angere `n trap. D'r is ouch `nen doorgang gemaak vanaaf `t kestieëlterrein nao de ómlègkende weie. `n Deil van Middelieëws Mofert speelt zich namelik aaf inne weie róndj `t Kestieël. Dao zeen vriewilligers ouch al bezig mit ónger angere `t opzètte van tente. Ane veurkantj van `t Kestieël (ane kantj vanne Hoesdiek) haet me-n `n trap gemaak, óm ouch via deze kant `t Kestieël op te klömme.

Vergaet neet mit te doon ane priesvraog van Mofert.nl, womit se kaarte kóns winne veur Knights by knight, `t beslaote aovendjprogram van Middelieëws Mofert oppe zaoterdigaovendj. Bekiek `t nuutsberich veur mieë informatie.

Mits neet anges vermeldj, valle alle tekste op dees pagina ónger `n Creative Commons Licentie.