Aezelemert

Zónjig 12 juli zal de Stichting Montfort Promotion veure twieëdje kieër de Aezelemert organisere. Net wie `t veurig jaor is d'r van alles te belaeve veur jónk en aad. De Aezelemert doerd van 11 oere smorges toet 5 oere saoves.

Dit jaor zeen d'r oppen Aezelemert echte Belzje knolle te zeen. (Foto: Stichting Montfort Promotion)

Wie gezag is d'r van alles te belaeven in `t centrum van Mofert, zoeawie modeshows, kinjeranimatie, autoshows, preuverieje, aezeleclub, heitelóchbellonne, trakter op wip, standhajers, live meziek en demonstraties mit Belzje knolle. Ouch zólle daen daag alle winkels aop zeen. Doe maaks onnag kans op versjillende bellonvaarte

Net wie `t veurig jaor zal d'r oppe Bek `n groeat meziekterras zeen vanne Fómfaar. Ónger de klanke van stömmige meziek van versjillende orkeste kóns se diene dós lesse of aete van versjillende dinger vanne barbecue. D'r is live meziek vanne Blaoskepel De Nachsrave vannen Deelgaard, De Vosberg Muzikanten oet Heljen en de Arosakapel oet Bieëgdje. Wiejer zal nag de jeugfómfaar van Mofert same mitte blokfluiters vanne Fómfaar optraeje. Toet slot speelt de Moferse blaoskepel De Eigenheimer.

In verbandj mit dit evenement zólle versjillende straoten in `t centrum van Mofert daen daag aafgeslaote zeen. De volgende straote zóllen aafgeslaote waere mit oetzunjering van aanweunendje: D'n Diek, de Diekestraot, de Bek, de Kirkstraot, Ane Kirk, de Vaart, `t Fare, `t Velvin enne Vinkesteeg. Op `t Velvin zal d'r `n parkeerverbod zeen anen oeaskantj vanne waeg. De bushaltes oppe Bek en inne Zandj zólle tiedelik boete gebroek zeen. De bus veurtj daen daag euveren Hoesbóngerdwaeg richting Ech in plaats van euvere Groensebós. Oppen Hoesbóngerdwaeg waere tiedelikke haltes gemaak. `t Verkieër wuuert ómgelèjd via de Waarderwaeg, Sweeltjesbóswaeg, Brandlintjeswaeg, Lemmenswaeg, Gesträötje, Heiberg enne Zandj.

Mits neet anges vermeldj, valle alle tekste op dees pagina ónger `n Creative Commons Licentie.