Poging toet berouving oppe Waarderwaeg

Dondermiddig is oppe Waarderwaeg geprobeerd `n 59-jaorige vrouw oet Mofert te berouve mit ein of anger gaas. Óm `n oer of half veer waas de vrouw spulle in häöre wagen aan `t laje wie zie opèns van achter bie de kael gepak waerdje en mit ein of anger gaas in `t gezich gespaote waerdje. De vrouw stampdje nao achter wodoor de twieë oppe gróndj vele en de vrouw los kwoom. Door flink te sjrieëve wis de vrouw de belaoger aaf te sjrikke. Hae rendje weg op `t Räötje aan. De vrouw bleef óngedeerd en d'r is ouch nieks bie de vrouw weggepak.

De pliesie haet `n óngerzeuk gestart en haet geliek d'n ómgaeving aafgezóch mit `ne speurhóndj, zónger resultaat. De pliesie is op zeuk nao getuge van dit veurval, of luuj die get verdachs gezeen höbbe. De verdachte droog op `t moment vannen aanval `n gries bivakmöts mit gater. `t Geit óm `ne blanke man van róndj de 25 jaor, 170 toet 175 centimaeter lank, smaal postuur en blaw uig.

Höbtj geer deze man róndj daen tied inne buurt vanne Waarderwaeg gezeen, höbtj geer get anges verdachs gezeen of zeent geer getuug van dit veurval, meldj det dan bie de pliesie op telefoonnómmer 0900-8844. Geer kóntj uch ouch anoniem melje, door te belle mit Meld Misdaad Anoniem op nómmer 0800-7000.

Mits neet anges vermeldj, valle alle tekste op dees pagina ónger `n Creative Commons Licentie.