Aaj tieje herlaeve in Middelieëws Mofert

In `t weekend van 18 en 19 juli zólle de gloriedaag van `t Amb Mofert herlaeve op `t Kestieël. De Fómfaar organiseert dan in samewirking mit de Stichting Kasteel Montfort en `ne gansen houp vriewilligers `t evenement Middelieëws Mofert. `t Evenement is al dökker gehaje en belaof ouch dit kieër weer `n flink spektakel te waere. Ruum 250 acteurs en figurante in historische kleiaasj bringen `t rieke verleje van Kestieël Mofert toet laeve. Tösse mertkrieëmers, troubarours, ambachsluuj, mer ouch adellike dames, ridders, zwaardvechters en baogsjötters kónne de bezeukers de sfeer preuve van lang vervlaoge tieje.

`t Broedspaar same mitte ajers en drosserd Matthias van Kessel. (Foto: Organisatie Middeleeuws Montfort)

Veer waere mitgenómme nao juli 1342. D'r is gans get te doon op `t Kestieël, ómdet Margaretha, dochter van Reinoud van Gelder, geit trouwe mit Gerard, zoon van graaf Wullem van Gulik. Miense van heinde en verre zeen nao Mofert aafgeleis veur `t broelofsfieës.

Rónjelóm `t Kestieël höbbe tieëntalle ridders, sjildjknapen en baogsjötters haor tenten opgeslage. Zie toeane häör vechkunsten en lieëre de kinjer ónger angere zwaardvechte. Op `t Kestieël is keukemeister Ghiseber bezig mit make van `t fieësmaal en drosserd Mathias van Kessel inspecteerd de waopekamer. Óngertösse waere de bezeukers vermaak mit póppespel, dans en meziek. D'r is op `t slotplein `n roofvogelshow en oppe Veurhaof prebere marskrieëmers en ambachsluuj häör waar ane man te bringe. Hie vindj ouch `n rechzitting vanne sjepebank plaats en nag väöl mieë activiteite.

`t Hoeagepunt van `t program is `t groeate riddertoernooi, det ter ieëre van `t broedspaar gehaje wuuert. Zès geharnaste ridders te paerd gaon streide ómmen ieër.

Van 12.00 toet 18.00 oere kóntj geer genete van `n stök of 30 veurstèllinge en taferele. Bezeukers kónnen op eder willekeurig moment kómme en nao eige veurkeur `n wanjeling maken door en róndj `t Kestieël. D'r zeen demonstraties, sketches, toneelstökke, `n riddertoernooi, kinjeractiviteite, meziek, vermaak en genóg te aeten en te drinke.

Mits neet anges vermeldj, valle alle tekste op dees pagina ónger `n Creative Commons Licentie.