8e Moferter Oldtimer Treffe

Kómmendj weekend is `t weer zoeawied. Dan zal de Sjötterie weer `t jaorlikse Moferter Oldtimer Treffe haje. In `t weekend van 9 en 10 mei kóns se-n op `t MOT-terrein vlakbie `t Kestieël weer van alles bekieken op `t gebied van oldtimers: van twieëwielers toet vrachwages, mer ouch trakters, wèrktuge, busse, luxwages en nöm mer op. D'n entree is € 5,- inclusief ein consumptiebon. D'n entree veur zaoterdig is ouch zónjig geljig.

`t Program is weer hieël gevarieerd. Zaoterdigmorge is vanaaf 8 oeren `t aanlevere van materiaal meugelik. Deilnaemers kónne zich van 10 toet 6 aanmelje bie `t secretariaat. Veur de trakters is d'r saoves nag `n tourtoch door `t Moferter veldj. Inne tent treujt saoves de Janse Bagge Bend op. Hie mos se waal kaarte veur koupe. Die kosten inne veurverkoup € 5,- en ane daagkassa € 8,-. Kaarte zeen inne veurverkoup te kriege bie De Vogel, D'n Hoes, Kefee Tiese, Riech, slechter Smeets en Bekker Cox (ouch in Berg en Postert). In `t veurprogramma van Janse Bagge, zal `ne medolic matelband mitte ónoetspraekbare naam ''Arkngthand'' optraeje.

Sónjes is d'r ouch van alles te doon. Vanaaf 8 oeren is `t Mofers ontbijt veur de euvernachters en de luuj, waat zich bie de deilnaemende óngernaemers (bekker Cox, Riech en slechter Smeets) zich `n kaart hieveur bie-ein höbbe gespaard. Van 9 toet 12 is aanveur van materiaal meugelik. Deilnaemers kónne zich dan ouch aanmelje bie `t secretariaat. Wiejer is d'r van alles te belaeve: demonstraties, aje ambachte, attracties veur de kinjer, nöm mer op. Ouch is d'r sónjes `n tourtoch veur twieëwielers en luxwages.

Dae zónjig zal de Internationale Historische Automobiel Club `n tourtoch vare door de ómgaeving van Mofert. Zie zólle ouch `n bezeuk bringe aan `t MOT. `t Geit hie óm auto's van veure Twieëdje Werreldoorlog, wovan de aadste oet 1912 is. Op www.ihac.nl kóns se alvas kieke waatfer wages det zeen. Behalve dees club zal d'r zónjig onnag `n tourtoch door Limburg zeen mit oldtimer autobusse. Ouch zie zollen `n bezeuk bringen aan `t MOT.

Net wie de veurige jaore organiseerd de Saurer Club Schweiz tegeliekertied `t Nederlandse Saurer en Berna Treffe. Dit jaor is det al veur de derde keer. Mieë informatie euver dees zwitserse vrachwages vinjs de op www.saurerlkw.ch.

Mits neet anges vermeldj, valle alle tekste op dees pagina ónger `n Creative Commons Licentie.