Moferter OIdtimer Treffe

Moferter Oldtimer Treffe mit optraeje van Mooi Wark

In `t weekend van 1 en 2 mei organiseert de Sjötterie weer `t jaolikse Moferter Oldtimer Treffe. Doe vinjs d'r alles waat vèltj ónger de catergorie ''oldtimer'''. Van wèrktuug toet vrachwage, van brómmer toet trakter en alles waat d'rtössenin zitj. Saoterdès is saoves `n optraeje van de Drentse formatie Mooi Wark.

Óm ouch dit 9e MOT weer toet `n succes te make wuuertj d'r samegewirk mit de Montforter Tractor Vrienden, The Old Pick-Up Club De Pook en de Saurer Club Schweiz oet Zwitserlandj veur `t 4e Nederlandse Saurer en Berna Treffe.

Saoterdès vink óm 8 oere d'n aanveur van materieel aan. Van 10 toet 18 oere is `t secretariaat geäöpendj óm dich aan te melje. D'r is zoeawaal saoterdès es sónjès `n ruulbuuers. Inne vreugen aovendj is d'r veur trakters `n toertoch door `t Moferter veldj. Saoves is dus det optraeje van Mooi Wark mit in `t veurprogramma de Moferse groep Fever of Life. De kaarte kosten inne veurverkoup € 8 en € 10 anen daagkassa.

De zónjig begintj óm 8 oere mit `t Mofers ontbijt. Deze traditie is destieds begós es spek-mit-eier aete veur de euvernachters. Allewiel kóns se dich ouch zelf `n kaart veur dit ontbijt bie-ein spare bie de deilnaemende Moferse óngernummers. Óm 9 oere gaon `t terrein en `t secretariaat aop. Deilnaemers kónne zich toet 12 oeren aanmelje. Vanaaf 10 oere is frühshoppe. Wiejer is d'r te väöl óm op te numme: kófferbakverkoup, demonstraties, aje ambachte, attrakties veure kinjer. Smiddès is d'r `n tourtoch veur luxwages en twieëwielers. Fèng, `t MOT is `n bezeuk zeker waerd, es bezeuker of es deilnummer.

Mits neet anges vermeldj, valle alle tekste op dees pagina ónger `n Creative Commons Licentie.